GETÜRDÜN MÜJDE-İ TEŞRİFİNİ EY BAD HOŞ GELDÜN - NEYLİ
Gazel
Getürdün müjde-i teşrîfini ey bâd hoş geldün
Dil-i gam-gînüm itdün gussadan âzâd hoş geldün
Gelür ol kaşları yâ cüst-ü-cû eyler seni çün kim
Yerün var sînede ey nâvek-i bî-dâd hoş geldün
Peyâm-ı vasl ile geldün nesîmâ bâğ-ı kûyından
Bu mahzûn-ı firâkı eyledün dil-şâd hoş geldün
Eğerçi gül-sitân-ı dehre geldi çok güzel ammâ
Bana sen cümleden ey gül-bün-i âzâd hoş geldün
Olup ey feyz-i istiʿdâd hem-dem tabʿ-ı Neylîye
Bu nazm-ı pâke oldun bâʿis-i îcâd hoş geldün
(Uzun, Adnan (1991). Neylî, Divan (Tenkitli Metin). Yüksek Lisans Tezi. Edirne: Trakya Üniversitesi. 109).
http://teis.yesevi.edu.tr
İLGİLİ İÇERİK
