DEĞİLDİR RİŞTE-İ DİL-GEŞTE TARF-I EBRUVANINDAN - ŞEYHÜLİSLAM ESAD EFENDİ
Gazel
Değildir rişte-i dil-geşte tarf-ı ebruvânından
Çekilse çille-i serd-i elem bin kez kemânından
Hayâl-i gerd-i hattın pür-nem etmiş çeşm-i ‘uşşâkı
‘Aceb kim katreler rîzîde olmuş sürmedânından
Olur mı nîk-hû bed-tıynetân âlâyiş-i ferle
Belî bulmaz tegayyür tab’-ı âhen zer-feşânından
Güvâhî kâr-ı nâ-hemvârının eczâ-yı zâtıdır
‘Ayândır herkesin evzâ‘ı tertîb-i beyânından
Sudûr-ı tavr-ı gûn-â-gûnunu ta’yîb-sâz olma
Bilen taksîrini mikdâr-ı tenşît-ı zamânından
Olurmuş inzivâ kısmet-rübâ-yı pây kim bûmun
Gıdâ-yı ‘ayş oldu hod nihâdî-i nihânından
Gedâyân-ı sühan deryûze-kâr-ı nâkd-i nazm olsa
Sezâdır Es’ad’ın i’câz-ı tab’-ı kâmrânından
(İnce, Adnan (hzl.) (2005). Tezkiretü’ş-Şu’arâ Sâlim Efendi. Ankara: AKM Yay.171.)
İLGİLİ İÇERİK