BİR SEMEN-SİMA'YA MEH-İ RA'NAYA DÜŞDİ GÖNLÜMÜZ - NEYLİ
Gazel
Bir semen-sîmâ’ya meh-i raʿnâya düşdi gönlümüz
Bülbül-âsâ ol gül-i zîbâya düşdi gönlümüz
Laġziş-i pây-ı heves hâtır-şikest itdi bizi
Seng-dil bir dil-ber-i hod-re’ye düşdi gönlümüz
Görse cevrin rahm ider ʿuşşâka çarh-ı bed-mihir
Pür-cefâ şûh-ı sitem-fermâya düşdi gönlümüz
Ol siyeh-çeşm âfetün müşgîn hat u hâlin görüb
Şimdi gûnâ-gûn ʿaceb sevdâya düşdi gönlümüz
Kısmet-i bezm-i belâda Neylîyâ rûz-ı elest
Serv-veş bir kâmet-i bâlâya düşdi gönlümüz
(Uzun, Adnan (1991). Neylî, Divan (Tenkitli Metin). Yüksek Lisans Tezi. Edirne: Trakya Üniversitesi. 100).
http://teis.yesevi.edu.tr
İLGİLİ İÇERİK