BİR SAFA BAHŞEDELİM GEL ŞU DİL-İ NAŞADA - NEDİM
ŞARKI
Bir safa bahşedelim gel şu dil-i nâşâda
Gidelim serv-i revânım yürü Sa'dâbâd'a
İşte üç- çifte kayık iskelede âmâde
Gidelim serv-i revanim yürü Sa'dâbâd'a
Gülelim oynayalım, kâm alalım dünyadan
Mâ-i tesnîm içelim çeşme-i nev- peydâdan
Görelim âb-ı hayât aktığın ejderhadan
Gidelim serv-i revânım yürü Sa'dâbâd'a
Geh varıp havz kenârında hıraman olalım
Geh gelip kasr-ı cinan seyrine hayrân olalım
Gâh şarkı okuyup gâh gazel-hân olalım
Gidelim serv-i revânım yürü Sa'dâbâd'a
İzn alıp cum'a namâzına deyü mâderden
Bir gün uğrılayalım çerh-i sitem-perverden
Dolaşıp iskeleye doğru nihân yollardan
Gidelim serv-i revânım yürü Sa'dâbâd'a
Bir sen ü bir ben ü bir mutrıb-ı pâkize-edâ
İznin olursa eğer bir de Nedim-i şeydâ
Gayri yârânı bu günlük edip ey şûh, fedâ
Gidelim serv-i revânım yürü Sa'dâbâd'a
İLGİLİ İÇERİK