NEDİM – BAK SİTANBUL'UN ŞU SADABAD...- NEDİM
KASİDE
1. Bak Sitanbûl’un şu Sadâbad- nev bünyanına
Âdemin canlar katar âb u hevâsı canına
2. Ey sabâ gördün mü mislin bunca demdir âlemin
Püşt-i pâ urmaktasın İran’ına, Turan’ına.
3. Ey felek insaf, ey mihr-i cihân-ârâ âmân
Bir nazîri var ise söylen konulsun yanına.
4. Ben de bilmem böyle rûh-efzâlığın aslın meğer
Hızr tohm-ı ömr-i câvîd ekti nahlistanına.
5. Hey ne feyz-i cavidandır kim olur serv-i sehi
Sürseler bir katra abın navegin peykanın
6. Hey ne hâlettir ki dûdun sünbül-i sîrâb-eder
Uğrasa bâd-i sabâsı düzahın nirânına
7. Şöyle feyzâfeyzdir çûş ü hurûş-i nevbahâr
Kim erişmiştir telâtum âsmân eyvanına
8. Turfe rengâreng-i âheng eylemiş sahrâyı pür
Kûh ses verdikçe şeydâ bülbülün efgânına
9. Sabr ü tâkatsiz çıkup bir gül dahi peydâ eder
Hande sığmaz goncenin zirâ leb-i handânına
10. Arşedek çıkmakta mânend-i dûâ-yi müstecâb
Uğrayan âb-i musaffa râh-i şâdırvânına
11. Sizde böyle müşg olur mu deyu hâkinden biraz
Ah göndersem sabâ ile Huten hâkânına
12. Cedvel-i sim içre âdem binse bir zevrakçeye
İstese mümkün varılmak cennetin tâ yanına
13. Olsa ger kasrındaki nakş ü nigâra bir şebîh
Anı yazmaz mıydı GaffârÎ Nigâristânına
14. Olsa Kisrâlar zamânında ya Firdevsî anı
Eylemez miydi şeref Şehnâmenin unvânına
15. Gûş kıl ey rûh-i Kisrâ ey revân-i Cem işit
Ben kapılmam ehl-i târîhin sühan sencânına
16. İkinizde olmamış mâlik ana aldım haber
Çerh-i pirin and verdim dinine imânına
17. Dersiniz kim çerh-i pîre yok yere verdin kasem
Kim o bîîmandır anın kim bakar eymâmna
18. Vaktinizde çerh âmennâ ki bîîmân idi
Ehl-i dil makrûn idi endûh-i bîpâyânına
19. Şimdi ammâ ehl-perverdir müselmandır tamâm
Olalı mahkûm Sultân Ahmedin fermanına
Vezni: Failatün - Failatün - Failatün – Failün
İLGİLİ İÇERİK
NEDİM'İN HAYATI VE EDEBİ KİŞİLİĞİ