Örnek 12.
Nazire gazel
Nedim’in Fuzulîye naziresi
1. Hayret ey büt suretin gördükde lal eyler meni
Sûret-i hâlüm gören suret hayâl eyler meni
2. Mihr salmazsan mana rahm eylemezsen munca kim
Sâye tek sevdâ-yı zülfün pâymâl eyler meni
3. Za’f-ı tâli’ mâni-i tevfîk olur her nice kim
Iltifâtun arzû-mend-i visâl eyler meni
4. Men gedâ sen şâha yâr olmak yoğ amma neyleyem
Arzû sergeşte-i fikr-i muhâl eyler meni
5. Tîr-i gamzen atma kim bağrum deler kanum töker
Akd-i zülfün açma kim âşüfte-hâl eyler meni
6. Dehr vakf itmiş meni nevres cevânlar aşkına
Her yeten mehveş esîr-i hatt u hâl eyler meni
7. Ey Fuzûlî kılmazam terk-i tarîk-i aşk kim
Bu fazilet dâhil-i ehl-i kemâl eyler meni
Fuzûlî
- ------- -------
1. Bûs-ı la’lün şöyle sîrâb-ı zülâl eyler beni
Kim gören âb hayât içmiş hayâl eyler beni
2. Şâ’ire söz bulmağa minnet ne ammâ neyleyen
Ah kim hayret seni gördükçe lâl eyler beni
3. Sevdüğüm câm-ı meye hâcet nedür la’l-i lebün
Bir şeker handeyle mest-i bî-mecâl eyler beni
4. Bâğda zülf û ruhun andukça bu kimdür deyu
Sünbül ü gül biribirinden su’âl eyler beni
5. Nükhet-i zülfünde geldükçe nesîm-i nevbahâr
Turra-i sünbül-sıfat âşüfte-hâl eyler beni
6. Nâtüvânam şöyle çeşmün hasretinden kim gehi
Sâye-i müjgân-ı âhû pâymâl eyler beni
7. Gerdişin gördükçe sâkî-i mülâyim-meşrebün
Arzû sergeşte-i fikr-i muhâl eyler beni
8. Hasret-i çeşmünle ben hâk-i siyâh olsam dahi
Baht âhir sürme-i çeşm-i gazâl eyler beni
9. Gûyiyâ bilmez efendüm bende-i dîrînesin
Kim Nedîmâ bu mıdır deyu su’âl eyler beni
Nedim
Türk Edebiyatında Nazım Şekilleri, Haluk İpekten
- << Önceki
- Sonraki
